Bimong Cam lơy
Hư dơng tanan bblwak rabuw thun
Bimaw angin dhul mul klak brak
Rup pabhap tani, thơp xwan hư hapak?
Habơr yuw jang tabbang bbauk tapak drei
Kuw dơng ala takai hư patauk gila tablaiw tablait
Kwơr li-auw takraiw kachaing kachuc layuw bwai
Hư yap waktu mưng raxa
Kuw dar yah biruw mưtưh lơngka
Nan blauh kalik kanhing bbuk patih mưta bang
Hư duk lawah lingiw rawang rai
Kuw hakak jalan dhwan dalơm yam ligah

Bimong Cam lơy hư haniim athah
Tok hatai kuw ngap mưwuix dunya
Haniim phwơl yuw halei?
Hư glơng maung haluh tapa takai karai
Dauk di kuw canah jwa rapơk rapac
Dhar phwơl libik nau?
Gwơn hư kaung ba nưm krung
Pacơng binguk kuw lun bun raiy rup
Ia hơp hư nhjom tamư hatai kiak
Ia mưta kuw nhjar tabiak dơp dung
Ia harei saung xup mưklơm
Hajan pađiak angin saung plak tangin
Thiap ciim saung kađuh baw
Sa drei saung mưjwa
Oh đom min khim khiah!

Bimong Cam lơy…
Yuw mưda hu dauk harei ni
Kuw dơng ala takai hư ruh jruh
Klaik mưta linhaiy thaik hanuk rabuw thun
Nau ngan dauk wơk
Mưtưh klaih xwan thơk đong gơng gơh
Kakuh kakwai dalah apwei brok page
Ppapaih papwơn bilan thun jwa tappa
Sa harei kuw dađơp bbauk!