Inrasara

Tagalau throh ingu bbwơn thun rinaih
Bbwơn biluw bbwơn mưlun – bingu throh ralau gwơn
Blauh dahlak dauk thun bilan klaun tathrưk
Hatơp akauk tamư akhar tapuk đok bwai xwan

Dom ai kamei Caklaing
Dauk abih harei ray – ka-ing ai girak
Dauk tamư dalam mưlơm
Dom ai kamei araung bla papan kuh
Dauk wơr khing likei
Tada iaup tuk halei ai kac mưhit!

Di bbwơn mưlun angin alaung drei chot
Jalan lidhwơr min hatai yuw si tagrauk
Caur kauk, dhul pơr ngan pađiak pơr?

Mưmih jangaih rawang ray adei kamei xit
Chai nai patri bauh mưta juk wil
Dalam uk yuw oh mưda thuw klak!

Mei nau ariya li-auw thaik drwai
bimong krưh bia harei dơng kwac
cwah tamư mưlơm jwa o lac
tathik hiak xơp ew

Ra bal liwa tagok mưng tanran nhjom bbak
Brok mưng bbwơn cwah caur
Trun mưng cơk patuw mưlun
Ra bal liwa pơr mưng mưdin hadah.

PANWƠC PAĐIT

Kadha yaw amaik ru ai
Jang ragơm nan amaik ru mei kal xit
Mei tamư ding – panwơc ru lihik dhit.

Ai yuw dađơp bbauk
Luc ar harơk pala palei
Ariya xamưng oh palwơ truh mưyut drwai.

Blauh ai nau
Ppachang mei grơp kawơk jalan akieng darak
Dwix palak takai ka o wơr alauk danrak
Pahwai pahwai.

Hu kal krưh mưdin Ywơn
Kuw anit mai palei klak
Hu tuk hadei di mư-in
Tian kuw su-on hakak bak.

Binguk thei chang jalan pađiak
Palơm caur cwah nưgar Panrang

Patwei dhwan tanưh Baigaur
Takai kuw liphwai dauk urak